Tabe salamat salabih helu
dengan kapala kantor basupu

Pahayak karungut riwut balemu
palampang tanduk lewu Gadung Batu

Gadung Batu tandak sarita
aran kota Palangkaraya

Panengan busun Ranying Hatala
hajamban lingun bisak salaka

Kota jetuh tabela tutu
imbangun huang nyelu lime uju

Palangkaraya batambah maju
kota pasir melai danum nyahu

Lime puluh uju nyelu nampara
penataan kota Palangkaraya

Metuh Pahandut je masih desa

bapak Tjilik Riwut mendeng ngapala

Tagal jete je tundah kula
Jasa Tjilik Riwut patut irega

Ulang tahun Palangka halajur imbuka
satiap nyelu itah maraya

Lampang arae je kota cantik
kahalap kota saraba manarik

Bundaraan are je hai kurik
kaliling kota balampu listrik

Palangkaraya tarung hakumbang
Nambunan ampin riak galumbang

Peteh bapak Enun katika usang

utus Tambun Bungai je ela hayang

Kemajuan kota Palangkaraya
manjadi akan tandak sarita

sukup dengan adat budaya

tau manampung suku bahasa

Kalute kea gedung sakula
baton batihel uras inampa

Basusun batingkat negeri swasta
manampung pelajar dan mahasiswa

Ampie huang bidang pendidikan
pelajar berprestasi are peningkatan

Jetuh nah tanda kelau jaminan
tau mambangun Kal-Teng andau rahian

Haranan itah ba-atei bulat
mambangun Palangka huang kapakat

Adi Pura Kencana akan 'tanda hormat
hadiah bara Pemerintah Pusat

Batambah tinai ije kebanggaan
jadi imbangun ije jembatan

Hamparang dimpah sungei Kahayan
jalan sepeda motor tuntang sedan

Mudahan pasin Hatalla muhun
tauh rajaki halajur dinun

Belum damai, rakat dan rukun
Kalimantan Tengah tatap mambangun

Wayah jetuh lembut sejarah
Hagatang tarung Kalimantan Tengah

Hayak kasubur petak danum itah
kakayaan alam melimpah ruah

Semboyan itah je Isen Mulang
Pantang manyarah sahindai bajuang

Mudahan itah ba-umur panjang
tikas tuh helu sarita ingarang